الوسم: التنور

إجازة سعيدة لكل المدرسين والمدرسات واليوم سلمكم الله ييت المزرعة وقررت أسوي لحم مشواي في التنور اليدوي الشبكي أونه أبا سعرات حرارية قليلة شو انسوي لزوم هالعصر وجوب تخفيف الوزن

يبنا التنور ولبقنا فيه الظو

ومثل ما اتشوفون فيه عراوي على الاطراف عشان ايشل الشبك

وهذا الشبك غشوا موديله من عندي واللي ياي من العمرة عن طريق البر اييبله واحد إضافي

زهبنا اللحم وبهرناه بالكركم والملح وغسلته وعقب رديت ابهره بالبزار العربي

آسفة قطعته صغار لزوم الجيران والرجيم والراس طبعا للرجال

نزلته بكل رقة وحنان داخل التنور قصدي الشبك وغطيته وكل شوي أطمن وأصب شوي من الخلطه لي تمت في الطشت عسب يحمر زيادة ويستوي مثل مال مطاعم

اليمر تحته وهو يستوي على مهله نظيف وبعيد عن الرمل والرماد

المشهد الاخير لحم مشوي ويا العيش الملون بالزعفران وراح الرجيم يا غبوش

طبخته وأعدته لكم أختكم غبيشة