الوسم: الإستفاده

الموقع هذا جعل في خدمة الجميع سواء من بيع او شراء او غيره من الفائدة العلمية للحلال وكثير من الاخوان مب مقصرين في أعلامنا عن خبراتهم وتجاربهم واستشاراتهم وغيره من الامور المهمة للحلال .

كل شخص يحب الراحة النفسية والفكرية والجسدية وهذا الموقع وفر لي ولغيري الراحة في أني اعرض وابيع وأشتري وانا جالس في بيتنا ، لا انا شليت الحلال ورحت السوق وقعدت من الصبح لغاية العصر في السوق وضاع يومي ووقتي على الفاضي حلالي عندي في عزبتي واللي له خاطره فيه حياه الله في اي وقت مكرم ومعزز بأحسن الأعلاف ونظيف .

لكن انه يبخس الحلال بقيمة مالية لاتوفي حقه هذا الامر مرفوض ومهزله ولا تصدر الا من مخربين ومستغلين وغير جادين بعمليات الشراء اذا انا اعرض مثالا تيس ذبيحة واقل ذبيحة وحده بأخذها بروحها مب جملة بنقووول 550 درهم وانا عارضنها للمزاد ينفتح بابها ب ١٠٠ دهم ياخوي اللي فتحت الباب جزاك الله خير وما قصرت لكن الله الغني عن مشاركتك بهذه الطريقة اذا فتح الباب ب 100 دهم هل يعقل هذا الكلام اذا ما لك رغبة بالحلال لا تسوم وطرش حق العضو على الخاص انه يعطيك إياها ببلاش افضل من سومتك اللي بدايتها تخرب الموضوع .

فالإنسان له عقل ويفكر ولايظن اي عضو بان الادارة غافلة المخربين او المستهتريين بالسوم في مواضيع الاعضاء وكل عضو نعرف شخصيته وأسلوبه من خلال مشاركاته والعدد في الموقع مب بسيط لكن عمليات التتبع موجودة .

ونحن جميعنا ملاك ومربين او تجار او هواة الحمد الله تربطنا أوصال دم واحد وعادات واحدة سواء بالأسلوب او المعيشة وان كان هناك اختلاف بسيط فلا يذكر .

الموقع تبيع وانت مرتاح كل المعلومات تجدها بين يديك واذا كنت ضامن الشخص اللي شريت من عنده بتقوله خلاص طرش الحلال حتى انك ما بتتعنى تروح تجيب الحلال .

الامور كثيرة ولكن لو فكر الشخص فيها لوجد بان الموقع هذا يوفر له الكثير الكثير من الوقت والجهد .

وفي أخوة في الموقع نقدم لهم كل الاحترام والتقدير لالتزامهم بأمور كثيرة ونعتبرهم اداريين لهذا الموقع في حالة غيابنا

وان شاء الله ان هذا الموضوع يكون في التوجيه والتعريف بأمور غفل عنها البعض