السلام عليكم ورحمة الله وبركاته
عودة جديدة الى مراعي حلال الدار ومن منا يصبر عنهن
ياناس حلال الدار غير كله أحاسيس ومشاعر 
فيهم وطنية ناقصنهم الجواز 
الحين بتقولون غبوش خف مخها والا شو ياها اتخربط
أنا بخبركم الله يسلمكم أمس اشتريت مجموعة شاميات من عند أحد الاخوة الكرام
لا اتطالعوني مب لي بو عبد الله مصر أنه يبا يكون مجموعة منهم والواجب علي كزوجة
مطيعه أحترم هواية زوجي واختياره يكفي انه مال قليلا نحو تربية الحلال وانفطم
شويه عن عالم التجارة والبزنس المهم اخترت له مجموعة تبارك الله حلوات
وصنف وكل وحدة لونها غير وفاجأني الاخ المربي أنه عطاني وحده نونو توه مولوده
صغيرونه هدية حقي الظاهر أنه أمها ماتت وخذتها ياربي
ما اصغرونها طرشناهن المزرعه مع النونو ووصيتهم يرضعونها ومحد يهملها يتيمة 
والفليل نزلت لكم موضوع الترويم وهو عن تقبل الحلال لرضاعة الصغار منم من غير أمهاتهم
http://www.uaesheep.com/vb/#?t=72150 وهذا الرابط 
والصبح روحت المزرعه أشرف على المجموعة اليديدة واعيد التقسيم حتى لا يحدث
تزواج بين الشاميات وحلال الدار كل حد يلتزم بحدوده وتكوينه وخشمه وبراطمه 
هي مافينا باجر بو عبدالله يطالب بالحمض والتحاليل
انزين وأتأكد بالمرة أنه الشامية النونو ترضع طبيعي وأمورها تمام والحمدلله
في عز انشغالي وإذا وحده من حلال الدار المخضرمات مؤسسي العزبة على وشك الولادة
وين أنا الحق ما تلحق الزنوبه صوب والشيله صوب أبا أحقق شي
شفتها كانت تعبانه قلت لها حاسه بشي ؟
قالت هي
قلت الله يسهل عليج
والحمدلله الله عطانا تويس حلو عسلي لون واحد وطبعا تعرفون طقوس التعرف وتنظيف التيس
من قبل امه وفجأة يتني 
فكرة يوم شفت كيس المشيمة بعده ما طاح
بسرعه قمت ويبت الشامية الصغيرونه ولوثتها بماي الولادة مثل التيس اللي ينظفونه الحين
قلت خلني اطبق درس امس مال الترويم صخلة صغيرة وأم الان تلد ليش ما اجرب والحمدلله كل شي تم على مايرام تقبلتها ورضعت مع التيس والام مشت عليها الخطة لانها طيبة ومن حلال الدار وقلبها كبير وحنونه وو المهم الله يعلم لين متى هالمحبة بتدوم
يالسه اتشمها
الثنينة نعلمهم الرضاعه الاوليه
تمشي وياهم لانهم الحين عايلتها اليديده
شفتو كيف حلال الدار كم هو قلبه كبير وحنون ويضم الدنيا كلها بكل جنسياتها
كم أنت كبير يا حلال الدار
السموحة على رداءة التصوير الجو مغبر
|
المشاركة الأصلية كتبت بواسطة تاجر صغير
 دوم إماراتنا الحبيبه تضم الكل بحنان و موده
|
|
المشاركة الأصلية كتبت بواسطة راعى البكره
ما شاء الله تبارك الرحمن
|
|
المشاركة الأصلية كتبت بواسطة مزرعة طيور الختم.
ما شاء الله تبارك الرحمن
|
|
المشاركة الأصلية كتبت بواسطة adhami-22
دائماً مبدعة في طرح المواضيع المفيده والملفوفه بحس من الفكاهة الى الامام دائماً
|
تختلط فيه الطرافه وواقعية الامر
هذي حرمه طيبه ايحن قلبها بسرعه وما بتخليه ولو خلته فتره بترجع له
مثل قلوبنا يا غبيشه كل حد ايعور قلبنا حتى الي يخطون في حقنا نرجع ونعذرهم لانا انحب التسامح …
بس الغنم احسن منا في نقطه انهم يتحملون عيال غيرهم اما انا يدوب اتحمل صوت والهدوء فارضته على البيت والحمدلله…..ما فينا على الازعاج..
ومبروك على الإنتاج , وفكرتج رائعة
والحمدالله تكللت بالنجاح , بس حاولي تعودين واحد من المواليد على الرضاعة من المرضعه
أو من ماعز غير في حالة حليب الأم مايكفي غير راس واحد
تقبلي إعجابي م.هاوي
من شخص اروع
الله لا يحرمنا من جديدج
تقبلي مروري
ربي يبارك لك في مالك وحلالك
