شحالكم ؟
يالربع ابا طريقة عيش ولحم اللي يسوونه فالعزايم 
بجرب اسويه بروحي
بعد غسل اللحم وتنظيفه ويكون مقطع قطع كبيره نحطه في الجدر ونصب عليه ماي يغطيه ونحطه
علي النار يغلي
نشيل الريم اللي يتكون علي السطح ممكن تبدل الماي واذا الذبيحة صغيره ما يحتاج تغيير الماي
نحط عليه بصلتين مقطعه , اربع فصوص ثوم او اكثر حسب الرغبه اربع لومي يابس
بهارات صحيحه (. هال قرفه. مسمار. فلفل اسود )
بهارات ناعمه ( فلفل اسود هال. قرفه. كركم. بزار عربي يليلان )
يمكن اضافة فلفل اخضر حار حسب الرغبه او الفلفل الأحمر الحار
يترك علي النار حتي قبيل النضج نضيف الملح ونتركه يغلي حتي ياخذ طعم الملح
نطلع اللحم ونغطيه لين نخلص من العيش
من خلال التجربه الذبيحة الوحده يكفيها 12 كيله عيش ويكون العيش مغسول ومنقوع لمدة نصف ساعه
في قدر ثاني نحط زيت ونضيف له بهارات صحيحه. هال مسمار. قرفه. فلفل اسود ونخليهم شوي ثم نضيف البصل وفصين ثوم مقطع شرايح ونقلب حتي يستوي لون البصل اشقر
نصفي العيش ونصبه فوق البصل ونصب فوقه من مرق اللحم بالقياس كيلة العيش كيله ونص ماي في الكميات القليله
وكلما زاد العيش خففنا الماي
يمكن نضيف زيت اذا كانت الذبيحة ما فيها دسم
نتأكد من الملح والبهارات في مرق اللحم قبل وضع العيش
نتركه علي النار حتي ينشف الماي نضيف بصل شرايح محمر ونخلطه مع العيش يعطي نكه حلوه
نرص قطع اللحم علي العيش بعد ما نرشها بماء ورد وزعفران وهال ناعم وقوفه
في هذا الوقت يكون التنور جاهز ضو خفيفه لان العيش ما يحتاج نار قويه
الحشو: بصل مقطع قطع صغيره. عدس اصفر مسلوق زبيب او مشمش. بطاطس محمره تنثر فوق الصينيه عند التقديم. او نخي العلب. بهارات. ملح. صلصل
ألطريقه : نضع البصل في القدر ونضيف له الزيت ونقلب حتي ينضج ونحط شوي ثوم و نحط المشمش ونقلب زين
نحط البهارات. بزار عربي. هال. فلفل اسود. كركم. قرفه. الملح. صلصة الطماط
نضيف العدس الأصفر المسلوق. ونخلطه ونخلىه علي نار هادئه لمدة عشرين دقيقه
ملاحظه: نوعية البزار العربي تفرق في الطعم.
يترك العيش في التنور من نصف ساعه الي ساعه ويمكن تسكيره علي الجمر او في الفرن
عند التقديم نغرف العيش في الصينيه ونحط الحشوه ونرص اللحم ونثر البطاطس المحمر
وبالنسبة للراس أنا اطبخه بروحه والفه بقصدير واحطه في التنور مع العيش
وبالعافيه عليكم
لكن الأفضل قبل لا تخلين اللحم ف الجدر تخلين الماي يغلي ومن تشوفينه يغلي ترمي البهارات والليمون اليابس بعدها ترمي اللحم
وتكملي باقي خطتج ما شاء الله
في طريقة تخله اللحم يطعم وكأنه تنور … هذي الطريقة يسونها ف المطاعم المندي وهذي الطريقة تصلح للحم وللعيش
وهي ::
بعد ما يجهز اللحم تنقله إلى جدر واسع وتيب كوب شاي وفيه زيت طبعا يكون نص الكوب وتخلاه وسط اللحم وتيب 3 جمرات وترماهن في الزيت بتشوف الدخان يطلع كثير أنت بتكون مجهز غطا الجدر وألمنيوم بعد ما ترما الجمر تغلق الجدر ب الألمنيوم ع السريع وبعدها تغلقه ب الغطا وتخله فوجه شي ثجيل (قدر ما تستطيع لا تخله الدخان يطلع) وقبل لا تنكب الغدا طلع الكوب..
كذالك يصير للأرز لكن بما أنك تسوى للحم ما يحتاج تسوى للأرز والعكس صحيح
جرب الطريقة حتى ف الأيام العادية في العيش
لكن سمعت من ناس أن هذي الطريقة غير صحية والله أعلم…
بس يعطيك طعم روووعه جربتها كثير وأكثر المطاعم الشعبية يسونها…
الله يعطيك الصحة ويبعد عنك الشر عسا تكون فهمت مقصدي بارك الله فيك
والطريقة اللي استخدمها في طبخ العيش واللحم هي طريقتنا الأصليه في الامارات يوم كانوا يطبخون في البيت للأعراس
اما بالنسبه للحم ينحط و الماي بارد حتي ما يصير عزر وهذا حسب معلوماتى ونفس الشئ الملح نحطه في الاخير
ودمت في حفظ الرحمن