اليوم حاب اطرح فكره بناء جلسه صيفية بسيطة وسهلة الفك والتركيب و طبعا الدزاين من وحي خيالي.
أولا:
نييب خشب مربع طول 4 أمتار عدد 11 ( متوفر مستعمل ) , و فلاي وود مقاس 12 ملي , و حديد بيبات 2 إنج ( متوفر مستعمل و الكميه المحتاجه للجلسه نص طن بي 1700 درهم ), و طابوق لوضع الجلسه فوقها, و كليبات لتثبيت الحديد ( 30 كليب بي 100 درهم) , و دعون أو خيزران,
الحين أتركم مع الصور:
الحين نحطه فوق صف الطابوق
وعقب نحفر حفر بطول متر ونحط البيب ( البيب طوله طبعا 4 أمتار و من الارض لين فوق بيكون 3 أمتار)
بعد ما ركبت بيبات جهه وحده
نحط بيب طول 6 متر بالعرض و نربط البيبات بالكليبات
والحين الجهة الثانيه (نقس عملية الجهه الاولى)
وعقب نوصل بين الجهتين بعد ببيب طول 6 متر
إنتهاء المرحله الاولى (طبعا كل هذا بيومين شغل)
الحين نركب حدايد عالجنب
جنب الثاني
نحط حديدتين كمدخل للجلسه ( فكرة الوالد , يقول للشواب أسهل عليهم الدخول)
نحط حدايد من خلف الجلسة بعد , للاسف ماصورت صوره خلفيه لكن هاي انشالله توضح الفكره
هالشكل النهائي للجلسه قبل تلبيسه ( وفرصه إذا كان عندكم بناء في المزرعه تخلي العمال يسوون صبيه قدام الجلسه) بعد فكرة الوالد 🙂
الحين نبدى بالتلبيس , اول شي نغطي السقف بي فلاي وود قياس 6 ملي ونحط كيس نيلون و عقب نحط دعن فوقه
عقب نلبس الجوانب بالخيزران , حتى نقدر نرفعه وقت ما نبى أو ننزله بكل سهوله و يوفر ضوء خلال النهار بدون ما ياذيك الشمس
هالشكل بعد التلبيس
الحين نلف الحدايد بالحبل , لنعطي الشكل التراثي و عسب ما يحر الحديد في الصيف
الصبيه الي قدام الجلسه أغراني و خلاني أمد حدايد له و أغطيه بالخيزران أحسن و أنظف من الدعن
و هذا يا إخوان الشكل النهائي من الداخل
ومن الخارج
وفي نهاية الموضوع أشكر الوالد الله يحفظه الي ركب ووصل الكهربا وركب المراوح بنفسه ( خطير بو محمد صاحب سوابق في التصليحات الكهربائيه :-))) )
و هاي جلسه ثانيه بنيتها قريب الحلال بس أصغر عن الاولى
وهاي بعد فكره نقدر نسوي منها مظله للحلال
الله يهنيك ولا يضرك انت واهلك
وجمعكم الله على طاعته وجعله الله مكان مبارك على ذكره وطاعته في الدنيا والاخرة 
فكره بصراحه ولا غلطه
ابداع × ابداع
والله يحفظ الوالد ويطور بعمره
يعطيك العافيه
ومجهود تشكرون عليه
صراحه ابداع
ويلسة روعة
الله يوفقك
