وبينما نحن في إجازتنا الاسبوعية في مزرعتنا الحبيبة وبين حلالنا الغالي علينا
تجمعت الغيوم وقصف الرعد ولمع البرق وهطل المطر وانخفضت درجات الحرارة
وبقيت مع معزاتي نتقافز تحت المطر فرحات سعيدات بنعمة المولى عز وجل
وبعدين خفت عليهم حبستهم بسرعة عن يمرضون 
المهم حبيت أني أسوي طبق إماراتي قديم
دايما أمهاتنا يسوونه في الشتا عاد أوني شتيت
وهو الجريش بالدجاج
أو يسمي أيضا اليريش
وكالعادة الضحايا دجاج المزرعة اللي توه ما صدق يشوف
زخات من المطر ويفرح بها وعلى طول أبدناه 
والحين
نبا انشوف شو الموجود عندنا من المقادير
لاتنسون المطر ايصب برع ونحن بعيد عن البقالات والخروج في هذا الجو يعتبر مجازفة 
فالجود من الموجود
يتبع
الجريش راح اتحصلونه في الجمعية مكتوب عليه
جريش وهو القمح المبشور يشبه البرغل
وهو مناسب جدا للمصابين بالسكري
وللي يضرهم أكل العيش واللي يسوون بعد رجيم
والجريش سعراته قليله وما ايمتن
حطينا بارك الله فيكم ثلاث أكواب كبيرة وغسلناه
وودناه في الماي وراح اتشوفون أنه اتضاعف وانتفخ
وعلى الفرن نقلى البصل والفلفل الحار والدجاج المبهر بالبهار العربي وحبات من البهار الكبير كالفلفل الاسود والمسمار والقرفه
يوم اتهنهن البهار وشميتوا ريحته صبوا الماي
وحطوا اللومي الاسود والطماطم
طبعا البطاطس ما استخدمته خليته لشي غير وليوم غير 
واتركوا الخليط يفور لين ينضا الدجاج نوعا ما
وخلاف ييبوا الجريش وبواسطة صفاية الشاي
صفوا الماي عنه وحطوه رويدا رويدا على الصالونة
وبتلاحظون انفصال العظم عن اللحم وتحول الطبخة
الى ما يشبه الهريس خلوها تستوي لين ما ينشف ماها تقريبا
مع التقليب والنار اقل درجة
طفوها وبتهدا وتتماسك
وبتكون بها الشكل
ما أوصيكم تراها وجبة لذيذه للأطفال يقبلون عليها بشهية وأيضا مفرحة للشواب والمرضى عافاهم الله وفيها فوايد كثيرة
واللي يشوف عمره بخير وسهاله ولله الحمد
يبسطها بدهنه خنينة
من إعداد أختكم غبيشة
ما شاء الله عليج مشرفتنا المتميزه غبيشه ابدعتي
في الشرح الوافي و التصوير الرااااائع
ومبين علها وجبه دسمه ولذيذه ويبالنا نجربها
ودائما متميزه و متالقه في اطروحاتج
يعطيج الف عافيه وربي يوفقج
تقبلي خالص احترامي
تسلم على تشجيعكم وكلامكم الطيب اللي هو حافز لي ولغيري
أنه يحاول ويتفنن بقدر الامكان واييب الاشياء والمواضيع الغير متداولة دوم أكرر شكري أخي الكريم
ما شاء الله عليج
الله يعطيج العافية م فيج حيلة (غبيشة)
يوعتيني و انا في الدوام
ماشاء الله عليج
شكلها طبخه حلوه
بس مب جنه تشبه الهريس اشوي ؟؟؟
و في انتظار كل جديد