السلام عليكم ورحمة الله وبركاته
بدأت حكاية هذه الطبخة في صباح هذا اليوم الجميل بينما كنت أتمشى في مدينة الذيد أشتري مالذ وطاب من الحشائش والجت لحبيباتي لفت نظري عند محل الوعايين المكان اللي لزمن أنمر عليه وانقدم له الولاء شفت الله يسلمكم قدر المندي المبسط وكان ذو أحجام وأسعار متفاوتة قدر يشل
ذبيحة وقدر يشل نص ذبيحة وقدر يشل ديايتين وأكثر
ومثل ما تشوفون فيه قاعدة لوضع الدجاج او اللحم وشويه بطريق البخار بدون لا يحترق أو انحط شي في قاع الجدر مثل جريد النخل
نشيت واشتريت حجمين بو الذبيحة للضيوف وبو ديايتين لعائلتي الصغيرة 
وعدت مسرعة الى العزبة قبل أن يداهمني دخول الظهر وجهزت طلبات ومقادير المندي هي قررت أني أسوي مندي إماراتي 
ذبحنا من دجاجات المزرعة وقطفنا من خيراتها بصل وطماطم وفلفل وبصل وبطاطس
واخترنا عيش بو سنارة لانه مناسب لنا كمواطنين خفيف وسهل الهضم
زهبنا البهارات كركم وقرفه وبزار عربي وشوية زيت وليمون وفركنا الدجاجات الطيبات
ووضعناهم في قدر المندي بعد أن قطعتهم فوقهم راس بصل وفلفل وكمن حبة بطاطا للنكهة
لاحظوا بدون ما أحط قطرة ماي لانه بحرارة القدر وبخار الدجاج بيستوي ثم غطيناه
من جهة أخرى بنجهز العيش
قطعنا بصل وطماطم وفلفل حار وقليناهن على النار لينما انهرس
شوفوا كيف صار
ثم أضفنا الماي والليمون الاسود
وطبعا ماننسى مطيبات العيش البهارات الكبيرة كمن حبة قرفة وهال وفلفل اسود ومسمار
والعيش المغسول
نظرة سريعة للدجاج نتطمن عليه في القدر الثاني 
الحمدلله الامور تمام
ثم اضفنا الرز
وتبارك الله استوى العيش ونضا
صورة قريبة
وهنا أيضا الدجاج استوى
ونقلته من قدره لين قدر العيش بالمسكه لانه استوى واذا شلناه بملعقة بيتكسر من كثر ما هو لين
ومستوي
وهني صبيت شوية زعفران عليه من فوق لاعطاء لون حلو
وغطيته مدة عشر دقايق لين يسكر
وهاي صورة صحني والحمدلله إني ذكرت أصورلكم والا جان كلته ولا شفتوه
وهذي طبخة اليوم الجمعة
طبختها وكتبتها وصورتها لكم أختكم أم عبد الله 
الجدر موجود في كل محلات الوعايين في الذيد والمدام والاسعار من 85 درهم وفوق لين ثلاثمية وخمسين
فكره حلوه و الصراحة يوعتنا
|
المشاركة الأصلية كتبت بواسطة pink rose
 ماشاء الله فكره حلوه كبديل للمندي اللي يحتاج تنور وشبك خاص وطبعا بدياي الدار له طعم ثاني ….هني وعافيه عليكم
|
|
المشاركة الأصلية كتبت بواسطة ملك الأبيض
|
|
المشاركة الأصلية كتبت بواسطة راعي الذيد
10×10
فكره حلوه و الصراحة يوعتنا |
|
المشاركة الأصلية كتبت بواسطة ملك الطاره
حراااام والله جعت الله يعين اروح ع ماك نطلب
|
|
المشاركة الأصلية كتبت بواسطة بومحمد المهيري
صحة وعافية ماعليج قصور
|
بس ما ذكرتي كم من الوقت خذت الطبخه خاصه الدياي
من حسن الحظ اني أمتلك هذا القدر البخاري واستخدمة في طبخ اللحم احيانا بس احط قليل من الماء علبة ماي صغيرة .
شكراً لكم .. نشوف جديدكم القادم
دائما مبدعه اختي ام عبدالله الله يوفقك