كيف نرتقي بطيورنا الى التميز 2024.

لاحظت اخواني بالفتره الاخيره الكل يعرض وماشالله عروضكم طيبه بس نحن هني نبي نرتقي بطيورنا ونافس فيها بقوه بمنتدى اغنام الامارات ويصبح منتدانا من المنتديات اللي تعرض الطيور النادره والجميله..

1- بداية خلونا نتفق ان الساس الطيب يعطيك شي طيب فمثلا لو شخص يحب يبدا بمشروع دواجن يستفسر ابدا ب10 ازواج او بزوج واحد بقيمة العشر ازواج؟
جوابي ان التميز ياتي بالنوعيه وليس الكميه , مثلا انا انتج طير فيتنامي واحد مميز افضل من 20 طير عادي , الطير العادي يستطيع اي شخص جلبه وتملكه لكن الطير النادر يخليك ملك النوادر

2- لو كنت انا من الشباب المشهود لي مثلا بالطيور الطيبه هل استمر على ما انا عليه؟
جوابي بالطبع لا صحيح انت مميز لكن الاخرين في طريقهم ايضا للتميز وبعدها بتشوف عمرك من مستواهم وشخص عادي اذا شو الحل؟
الحل ياشباب بالتراكيب الطيبه مثلا شخص ينتج تايلندي او باكستاني طلع من الطير 10 فروخ بالنسبه لي كفايه خله يدخل الطير على تايلنديه او باكستانيه من نسل اخر بالنهايه مابيخسر شي بس يمكن يبدع ويظهر طير طيب

3- شباب مانبي نعرض في منتدانا طيور غش ( بمعنى انك تعرف ان الدجاجه مضروبه بديج محلي) وتبيعها على اساس انها باكستانيه والشخص الاخر مسكين مايعرف وينتج منها وينتشر عندنا المستوى الهزيل اللي بالنهايه ينفرك من الحلال

4- وهالشي اساسي شباب نبي نعرف كيف نربي الطير صح؟
اول شي الطير يبي اهتمام من الصغر لاتدلع اي طير بروحه خله مع المجموعه ولو كان مميز لاتكثر له من الاكل عوده على علف التسمين لي سن خمس شهور وبعد ذلك عالباجره فقط
انا لاحظت وايد شباب يعطون كل انواع الطعام وهالشي غلط الطير يبي استقرار لاتعبه بالاكل عسب ماتضربه الاسهالات وخاصه السالمونيلا والكوكسيديا
بالنسبه للادويه والعلاجات لو تلاحظ مرض الطير لاتخاف وتسرف في العلاج اتبع العلاج الصح بيشفى الطير وعندك هل الخبره بالمنتدى مابيقصروا معاك

5- لانتاج طير طيب ويبشر بخير صف نيتك ولاتهلك الطير بالفايت والضرابه لان هالشي منهاي عنه ويسبب للطير الاذى والنزيف الداخلي – اعتني بمظهر الطير وجماله ودع عنك الفايت لنرتقي بطيورنا

هذا بعض اللي عندي وحبيت اعطي نصيحتي لكل الشباب عسب نرتقي بطيورنا ونحافظ عليها ويكون منتدانا من المنتديات المشهود لها بالطيور الانيقه

وموفقين ياشباب