بسم الله الرحمن الرحيم
السلام عليكم ورحمة الله وبركاته
وإشحالكم اخواني اعضاء منتدى اغنام الامارات
حاب اتشاركوني بصور رحلتي لإمارة أبوظبي يوم السبت الموافق 17-07-2010 م وبالتحديد فندق قصر الإمارات وبصراحة الفندق عيبني من كل النواحي يعني ما شاء الله عليه 100 % بصراحة يستاهل ان الواحد يزوره (اسويلهم دعاية) 
المهم بترككم مع صور واجهة الفندق
طبعاً أول ما وصلنا عند البوابة استقبونا بدلة القهوة والتمر
ومن وصلت الاستقبال اهدونا هالباقة
والفندق ما يحتاي ما شاء الله مساحته كبيرة وااايد فارسلولنا وحده اتعرفنا على مرافق الفندق وطبعا قمت اصور صور سريعة واليكم بعض الصور قبل ما اوصل الغرفة
(يتبـــع) 
ووصلتنا لباب الغرفة وهذا شكل الغرفة
وصور الحمام (وانتوا بكرامة)
(يتبـع)
وخذت جولة بالفندق وهالصور تبين حوض السباحة والحديقة الخلفية للفندق (اقصد الحديقة المطلة على البحر)
(يتبع)
وعوقت العشاء لفت نظري ان عندهم مطعم إماراتي فقلت بجربه لاني عيزت من المطاعم الاجنبية واول ماحدرت كان في استقبالنا اخت مواطنة (الله يوفجها) ومن حدرت اشوي شفت الديكورات تراثية واغاني ميحد حمد ومن اجدمت صوب المطبخ شفت الشيف علي البدواوي (إماراتي) راعي حتا وطبعا الي يتابع قناة سما دبي بيعرف الشيف علي البدواوي والي كان يطبخ الطبخات الشعبية ومن شفته استانست وسلمت عليه وابديت اعجابي بالمطعم الاماراتي وبالشيف الاماراتي وكانوا هناك طباخات مواطنات (الله يحفظ أهل البلاد) ويعطيهم العافية وهاي صورة الشيف علي البدواوي
واول ماقدمولنا سلة مخبوزات
(خبز رقاق + خبز تنور + خبز عليه حبة الحمرا)
واول شي طلبته شوربة
(كريمة بالزعفران بقطع سمك القرش والمحار)
وعقب طلبت سلطة جرجير
وهذا هو الحبول (بيض السمك) بصراحة مافيه حيلة
وحمسة ربيان
واترككم مع الثريد (فريد)
(يتبع)
وبعد هالعشوة الحلوة من الايدي الاماراتية اللي الواحد من ياكل يضمن النظافة والجودة رجعت الغرفة وكانت المفاجأة (عقولتهم هدية الفندق) واول ماحدرت الغرفة شفتهم فارشين الغرفة كلها ورود وشفت طاولة عليها كيكة ومشروب غازي (هب كحول) لووول وباقة ورد جميلة ومجهزين الغرفة بطريقة حلوة
اترككم مع الصور
ودمتم سالمين
خـــــــــــــــــــــــــــــــــــــــــــــــــ ــــيال
صراحة شئ خيالي
وتصوير رائع
وانا قيمة موضوعك وعطيتة ممتاز لأنة فعلاً موضوعك ممتع جدااا
عرفتنا على جوانب قصر الامارات
وعرفتنا على الشيف على البدواوي
واكتشفنا اشياء كثيرة عن قصر الامارات
وعقبالكم الحياة السعيدة والمديدة
تقبل مروري
ما شاء الله مكان رائع معني سرت كم مره ولكن ما لاحظة كل هذا
والله يعطيك العافيه ع تصوير الاكثر من رائع
مكان رائع وجميل والأروع والأجمل تصويرك وطريقة سردك لهذه التجربة الله يعطيك العافية اخوي ( الزعابي 777 )
وموفق في حياتك المستقبلية ….
اقتباس:
المشاركة الأصلية كتبت بواسطة الهاجري  خـــــــــــــــــــــــــــــــــــــــــــــــــ ــــيال
صراحة شئ خيالي
وتصوير رائع
وانا قيمة موضوعك وعطيتة ممتاز لأنة فعلاً موضوعك ممتع جدااا
عرفتنا على جوانب قصر الامارات
وعرفتنا على الشيف على البدواوي
واكتشفنا اشياء كثيرة عن قصر الامارات
وعقبالكم الحياة السعيدة والمديدة
تقبل مروري
|
اسعدني مرورك يالهاجري
وسعدت اكثر من عرفت انك اعطيت الموضوع ممتاز
وانا حبيت احط هالموضوع عسب اشجع على السياحة الداخلية
وانا اول مرة اعرف ان هناك مطعم إماراتي عالمي بايدي اماراتية بفنادق خمس نجوم
الصراحة الفندق روعة
ومبروك الفرح يا الزعابي
ومشكور على الصور
