تعرفون أن الصيف دخل وكل واح خايف على حلاله من الحر. فكرة أول شي أن أشتري مكيف صحراوي بس المكيف يريد كهرباء يعني لازم تشتري جنريتر و الجنريتر يريد بترول يعني بتكون هناك تكلفه. واليوم حبيت أشاركم بفكره بسيطه سويتها عندي في العزبه. الفكره هي عباره عن خيشه تكون على الشبك ويكون القطرات عليها حتى تبرد على الحيوانات إلي عندك. خلونا ندخل في التفاصيل أحسن.
المطلوب:-
1. قطارات ماء.
2. بيب ماء.
3. خيشه أو جونيه.
4. تانكي ماء.
أحسن شي أخليكم مع الصور:-
أول شي لازم تركبون الخيشه أو الجونيه وتكون على نصف الشبك من الأسفل و يكون الشبك من فوق مفتوح عشان يدخل الهواء و بعدين تركبون القطارات.
وهذا المنظر من الخارج
ثم توصلون البيب بالتانكي بس لازم يكون التانكي أعلى من المكان البيبات شوي عشان يكون هناك ضغط حتى يوصل الماء إلى كل الأماكن.
وهذه صور الأرانب و الدجاج مسدحات و مرتحات في يوم كانت درجة الحراره 47
واخيراً عندما تخف الحراره أو يا وقت العصر أرفعوا الخياشه ووقفوا الماء عشان ماتخسرونه وخلوهن على الهواء الطبيعي.
هذه الفكره ممتازه إلى عنده أغنام غاليه و يخاف عليها مثل النجديات يقدر يطبقها وماتكلف شي بالنسبه للمكيف وخسارت الكهرباء. وهذه الطريقه تساعد الحلال على أن يتعود شوي على الحر مش على المكيفات.
و لا تنسونا من صالح دعائكم.
فكــره ممتـازه أخوي المصعبي وغير مكلفه بالمره وشي أكييد راح يفيد راعيين الحلال ..
لو صوره أقرب للبيب .. شو معلق فيه أو شو مركب فيه مرش؟
ولو تعطي تفاصيل أكثر لمربين الحلال عن مثلا من وين ممكن يشترون الخيش؟
من وين إييبون المرش مع الأسعار لو ممكن ..
وما قصرت أخوي الله يجزيك كل خير ومجهود تستاهل عليه التقييم
إحترامي
تحياتي .
بس ما بيسبب لك رطوبة وتكاثر البكتيريا ؟؟
انتبه اخوي عن يشربون من الماي الي ينقط من الخيشه لان بيكون فيه رمل وبكتيريا
فكرة حلوة وبالتوفيج
تقبل مروري اخوم بو شما
لو صوره أقرب للبيب .. شو معلق فيه أو شو مركب فيه مرش؟
البيب مركب فيه قطاره وهناك أنواع كثيره للقطارات تقدر تستخدمها.
ولو تعطي تفاصيل أكثر لمربين الحلال عن مثلا من وين ممكن يشترون الخيش؟
الخيشه تقدر تحصلها عند المحلات التي تبيع مواد البناء أو المحلات الزراعيه.
من وين إييبون المرش مع الأسعار لو ممكن ..
بالنسبه للأسعار كالتالي:-
– البيب 100 متر يبيعونه بي 150 درهم.
– القطارات يبيعونها بي نصف درهم وإذا بتشتري كيس كامل بيكون أرخص عليك.
– الخيشه 50 متر بي 80 درهم.
– صنبور الماء إلي في الخزان بي 5 دراهم
و بالنسبه لسؤال أخونا سحب و الطنيجي
إذا أنتبهتوا إلى الصور بتشوفون أني مخلي المكان الأعلى من الشبك مفتوح عشان يدخل الهوا و هذا يمنع من تكون البكتيريا عشان البكتيريا تتكون في الأماكن المغلقه بالكامل. و أيضاً أنا أعمل على رفع الخيشه عصراً عشان تتهوا الغرف.
وتحياتي للجميع وحياكم العزبه في أي وقت إذا أرتم أن تشوفوا على الطبيعه.
وجزاك خير
دايما نتظر مشاركاتك المميزه ياخوي