اللي بغات تشرب اتاي او شاي المغربي ديال الشلوح اللي شربوا تيدوخ هههههه تدخل

هاد الطريقة كيصاوبوا بيها الشلوح اتاي و اللي داقوا تيحماااق عليه و خصوصا التوريست و الأجانب كيعجبهوم هاد اتاي ما قاصحش و لذييييذ , هاد الطريقة خديتها من عند جدتي طبعا هي تبارك الله عليها بروفيسيونيل فتعمار أتاي و اغلبيتنا ما يشرب اتاي غير من ايديها , ايوا بقيت معاها حتى تعلمتو و وليت حتى انا كنديروا مزيان

اولا نديروا الما حتى تيغلي مزيااان , ناخدوا اتاي نديروا القدر الكافي , بالنسبة لبراد ديال 6 كيسان تنديروا 1 ملعقة صغيرة و نص ديال اتاي , و نخويوا عليه تقريبا كاس الى ربع ديال الما سخون و نحركوا شوية و نخويو داك الما فالكاس و نحتفظوا بيه , من بعد نخويوا تاني كاس الى ربع ديال الما السخون و نشللوا مزيان و نرميوا هاد الما , من بعد نعمروا البراد بالما سخون و نزيدوا داك الكاس اللي حيدنا فالتشليلة الأولى و نحطوا البراد يغلي شوية فوق العافية , من بعد ناخدوا النعناع طري نغسلوه مزيان و نقسموه بايدينا بحاليلا كنعصروه باش يطلق الريحة و نحطوه فالبراد و نخليوه واحد 2 دقايق يغلي حتى يطلع اتاي 2 مرات و نطفيوا البوطة و نزيدوا عليه السكر حسب الذوق , نخلطوا بالمعلقة المرة الأولى , من بعد نبداو نخويوا فالكاس و نردوا فالبراد تقريبا 4 مرات , و هاهو اتاي واجد للشرب بالصحة و الراحة

البنات راه الصورة شوية غمقاتو راه تيجي لونو فاتح ماشي بحال فالصورة و ما صورتو حتى مشات الكشكوشة حيث غير تنصور فالكوزينة و عندي الضياف تشغلت مع المسمن عاد صورتو قبلوا عليا و صافي